26
Маусым
«Ақ жол» партиясы журналистерді марапаттады
26 маусым 2017 жыл, «Ақ жол» ҚДП баспасөз қызметі
Бүгін бұқаралық ақпарат құралдары өкілдерінің кәсіби мерекесі. БАҚ өкілдері қашанда болсын қоғамдық өмірдің негізгі тірегі, ақпарат жаршысы екені әмбеге аян. Айтулы мереке қарсаңында, жыл сайынғы қалыптасқан дәстүр негізінде Қазақстанның «Ақ жол» партиясының басшылығы қоғамдық-саяси оқиғаларды тұрақты түрде халыққа насихаттап, үкімет пен халық, қоғамдық ұйым арасында дәнекер, алтын көпір болып жүрген журналистерді қабылдап, кәсіби мерекелерімен құттықтады. 
Партия басшысы Азат Тұрлыбекұлы өз сөзінде журналистердің қоғамдық өмірден алатын орны, ақпарат таратудағы рөлі мен маңызын айрықша атап, «Ақ жол» партиясының, партия атынан сайланған депутаттардың көтерген сауалдары мен түйткілді ойларын сол мезетте ақ жылдам халыққа жеткізіп, насихаттап, партия қызметін бағамдап жүретіндеріне разы болып, алғыс білдірді.
Сонымен қатар, партия төрағасы қазақтың ұлттық мүддесін қорғап, жоғын жоқтап, суығына тоңып, ыстығына күйіп, теңдік пен әділдікті талап етіп, үкімет пен атқарушы биліктің кейбір осал тұстарын сынап, Алаш қайраткерлерінің асыл мұрасы мен өнегелі істерін жүйелі түрде ұлықтап жүрген қазақ тілді үздік портал – «Абай.кз»-ке алғыс білдіріп, Алаш көсемі Әлихан Бөкейханның 15 томдық шығармалар жинағын естелікке сыйлады.
Құттықтауға арналған салтанатты жиын барысында журналистер қоғамдағы өзекті мәселелерді тілге тиек етті. А.Перуашев халықшыл мүддедегі журналистердің кеудесіне Алаш партиясымен үкіметінің 100 жылдық мерейтойына орай партия тарапынан арнайы даярлаған төсбелгі тақты. Шара соңында журналистерге естелік сый-сыяпат беріліп, арнайы ақ дастархан жайылды.
