26
Қантар
«Ақ жол» кәсіпкерлерге қарсы қылмыстық қудалауды тоқтатуды талап етті
ҚР Бас прокуроры
Ғ. Д. Нұрдәулетовке
Биылғы жылдың 21 қаңтарында өткен бизнес қауымдастықпен кездесуде Мемлекет басшысы Қ.Тоқаев іскерлік ахуал мен адал бәсекелестікті дамыту жөнінде бірқатар маңызды тапсырмалар берді.
«Ақ жол» фракциясы Президенттің экономиканы монополияландыру және билікке жақын құрылымдардың бәсекелестерге қарсы күштік әдістерді қолдануын сыни бағалауын қолдайды.
Атап айтқанда, Қасым-Жомарт Кемелұлы «Барлық тапсырыстарды бір компанияға бермеуді» тапсырды.
Дәл сол кездесуде Президент «Құқық қорғау органдарын коммерциялық субъектілердің дауларында пайдалану жағдайларын болдырмау жөнінде шаралар қабылдау керек. Егер мұндай жағдайлар анықталса, ең қатаң шаралар қабылдау қажет», - деді.
Мемлекет басшысы Бас прокуратураға осындай бұзушылықтарға ықпал ететін себептер мен жағдайларды анықтауды және оларға жол берген кінәлі адамдардың іс-әрекеттеріне қағидатты баға беруді тапсырды.
«Ақ жол» партиясына өңірлерден кәсіпкерлердің осы проблемалардың өзектілігін көрсететін өтініштері келіп түсуде.
Мәселен, семейлік кәсіпкер, «Металлист» ЖШС иесі Айдос Серікқалиұлы оған қарсы тергеушілер мен жедел уәкілдердің қалай қарсы әрекет еткені туралы хабарлады. Оған мемлекет басшысына басқа әріптестерімен бірге өңірдегі барлық ірі тендерлерді бір компания неліктен жеңіп алатынын тексеру және анықтау туралы өтінішке қол қойғаны үшін ғана қылмыстық іс қозғалған.
Келесі күні шұғыл түрде облыс орталығынан жедел-тергеу тобы келіп, ел Президентіне жолданған өтінішке қол қойғандардың барлығынан жауап алады.
Содан кейін оның үйінде, компанияның барлық кеңселерінде бірнеше сағат бойы тінту жүргізетін полицияның одан да үлкен тобы келген. Компьютерлер, ноутбуктер, роутерлер, флешкалар, тіпті балалар планшеттері тәркіленді.
Нәтижесінде, Президентке үндеу және әлеуметтік желілердегі ілеспе жарияланымдар жергілікті олигополияға жоғалған пайда түрінде 456 млн. теңге сомасына залал келтіргені туралы «дәлелдемелер» жинақталуда. Тергеу аяқталды, қылмыстық іс сотқа жіберілді, кәсіпкердің мүлкі тәркіленді, дегенмен мұндай дау тек экономикалық, азаматтық сипатта болуы керек. Бір қызығы, алғашқы екі тәуелсіз сараптама полицияның айыптауларын растамады, бірақ полицияға «қажетті» қорытынды берген үшіншісі тағайындалды.
Сонымен қатар, ШҚО Полиция департаменті басқа кәсіпкермен мүліктік мәміле бойынша қылмыстық іс қозғады, дегенмен мұндай дау тек азаматтық-құқықтық тәртіпте қаралуға жатады. Шарт 2015 жылы шығынды, үлкен қарыздармен ауыртпалық түскен кәсіпорынды сатып алу үшін жасалған. Шартқа сәйкес сатушы төлемді бөліп-бөліп қабылдауға келісті, өйткені кәсіпорын қайта қалпына келтіру бойынша жұмыс жасайды. Алты жыл ішінде ешқандай шағымдарсыз, келісім-шарт бойынша төлем есебінен үнемі қаражат алып, сатушы кенеттен түпкілікті есеп айырысудан бас тартып, сатып алушыны алдады деп айыптайды.
Тергеу органдары дереу тағы бір қылмыстық іс қозғаған, барлық қаржы-шаруашылық құжаттама тәркіленіп, компанияның қызметі толығымен тоқтатылған, ол үшін оны 1-санаттағы құрылыс лицензиясынан айырды.
Бұл Президент Тоқаев айтқандай: кәсіпкерлер полицияға, құжаттарды тінту мен алуға, жұмыстағы шектеулерге шағымданады.
Мұның бәрі оның қызметі жергілікті олигополияның мүдделерімен қиылысқандықтан.
Осыған байланысты, құрметті Ғизат Дәуренбекұлы, «Ақ жол» ҚДП депутаттық фракциясы істің мән-жайына араласпай, Президенттің «Құқық қорғау органдарын коммерциялық дауларда пайдалануды болдырмау» деген тапсырмасын орындауды, ал «Бас прокуратураға кінәлі тұлғалардың іс-әрекеттеріне қағидатты баға беруді» талап етеді.
Біз барлық осындай мысалдар бойынша қылмыстық істерді тоқтатуды және кәсіпкерлерді қудалауды, тараптарға өз келіспеушіліктерін азаматтық тәртіпте, бизнесті қорқытпай және жоймай шешуге мүмкіндік беруді талап етеміз.
Айта кетейік, Мемлекет басшысы өзінің бірінші Жолдауында ресми органдар тарапынан заңды кәсіпкерлікке кедергі жасау мемлекетке қарсы қылмыс ретінде бағалануы тиіс деп айтқан болатын, мұны 21 қаңтарда өткен кездесуде де қайталап өтті.
Құрметпен,
«Ақ жол» ҚДП фракциясының депутаттары
