13
Ақпан
Азат Перуашев: 10 жылдың ішінде бар кемшілігім осы бір эмоциям ғана болса, онда қалған істеріміз дұрыс екені сөзсіз…
«Ақ жол» партиясының төрағасы Азат Перуашев осыдан үш жыл бұрын журналистердің сауалына жауап беру кезінде көзіне жас алған сәтке қатысты пікір білдірді, деп хабарлайды Qazaquni.kz ақпарат агенттігі Bestnews.kz-ке сілтеме жасап.
Бұл эпизод Парламент қабырғасында, Қазақстанның Тұңғыш Президенті – Елбасы Нұрсұлтан Назарбаев отставкаға кеткен күні орын алған болатын.
Бүгін ОСК-да «Ақжолдың» партиялық тізімін тіркеу рәсімінен кейін журналистер Азат Тұрлыбекұлына осыған қатысты тағы да сұрақ қойды.
- Ер адамға тән жанарымнан жарты жас домалағаны - тұңғыш Президентке, не оның қызметінен кетуіне байланысты емес еді. Маған «90-шы жылдардың сіз үшін маңызы қандай?» деген жеке өміріме қатысты сұрақ қойылды. 90-шы жылдар біздің буынға оңай тиген жоқ. Жақындарымызды жоғалтқан сәттер болды. Эмоцияға ерік бергенім содан. Екіншіден, ақылды адамдар идеяларды талқылайды. Қалғандары - өзгелерді сөз қылады. Мен идеяларды талқылап, оларды жүзеге асыруды жөн көремін. Егер біреу мені сөз еткісі келсе - бұл олардың өз еркі. Бірақ, «Ақжолдың» парламенттегі 10 жылы ішінде бар кемшілігім осы бір эмоциям ғана болса, онда қалған істеріміз дұрыс екені сөзсіз. Ал, біз азаматпыз!, - деді А. Перуашев.
