01
Желтоқсан
Ақжолдықтар қолдау көрсеткен «Қазығұрт» командасы Республикалық турнирдің жеңімпазы атанды
1 желтоқсан 2024 жыл, «Ақ жол» демпартиясының баспасөз бөлімі
Шымкент қаласындағы «Достық» спорт кешенінде шағын футболдан Республикалық турнир өтті. Бұл Социалистік Еңбек ері Дулатбек Рахымбергеновті еске алуға арналған жарыс. Турнирдің басты мақсаты – жастарға батырдың еңбек жолын таныстырып, өмірлік үлгісін насихаттау.
Турнирге Шымкент, Түркістан қалалары мен Түркістан облысының 12 үздік командасы қатысты. Соның ішінде Қазығұрт ауданының «Қазығұрт» командасы қарсыластарын басым болып, турнирдің чемпионы атанды.
Командаға қолдау көрсету үшін 2024 жылдың 24 ақпанында «Ақ жол» партиясының Түркістан облыстық филиалының депутаттары арнайы кездесу өткізіп, футболшыларға жаңа спорт киімдерін табыстады. Бұл бастама Қазығұрт аудандық жастар ресурстық орталығының басшысы Бақытжан Жапбарқұловтың ұсынысы бойынша жүзеге асырылған еді.
«Қазығұрт» футбол командасының жеңісі – тынымсыз еңбек пен табандылықтың жемісі. Сонымен қатар, жас спортшыларға көрсеткен қолдаудың маңызын дәлелдеді. Мұндай жетістік жастарды ынталандырып қана қоймай, аймақтағы спорттың дамуына серпін береді.
Социалистік Еңбек ері Дулатбек
Рахымбергеновтің рухына арналған турнир спорт додасы ғана емес, ұрпаққа өнеге
болар тұлғаны еске алу шарасы ретінде де жоғары деңгейде өтті. Жеңімпаздардың
табысы аймақтың абыройын асқақтатып, Қазығұрт ауданын мақтан тұтарлық деңгейге
жеткізді.
