28
Сәуір
Бұл аспаннан түскен ақша емес - 'Егемен Қазақстан' газеті
Егемен Казахстан (Астана), № 81 (28305), 26.04.2014
Кәсіпкерлікті қаржыландыруға бөлінген 1 трлн. теңгені мақсатты пайдалану үшін бақылау қажет.
Президент Н.Ә.Назарбаев үстіміздегі жылғы 27 ақпанда кәсіпкерлікті қолдау бойынша кең көлемді мәлімдеме жасағаны белгілі. Мемлекет басшысы мәлімдемесінде ШОБ-ты тексеруге мораторий жариялап, бизнес омбудсмен қызметін бекітуді және жеке бизнесті қолдаудағы бірқатар өзекті шаралармен қатар, кәсіпкерлікті қаржыландыруға аса ірі сома – 1 трлн. теңге бөлуді және жіберуді тапсырды. Бұл – 5 миллиардтан астам АҚШ долларына бара-бар ақша. Сонымен бірге, Президент бөлінген қаржының нақты өндіріс секторына жіберілуіне баса назар аударды.
Бұл қадамның маңыздылығын айтып жеткізу мүмкін емес, өйткені, жалғасып жатқан әлемдік қаржы дағдарысы және сыртқы заемдарға қолжетімділік қысқарған жағдайда, экономика үшін қаржыландыру маңызды мәселелердің бірі болып отыр.
Мемлекет басшысы тапсырма берген күннен бастап біршама уақыт өтті. Осы кезең ішінде бизнес-қауымдастық экономикаға баруы тиіс айтылған қаржының түсуін, ереженің және оның талаптарының қабылдануын тағатсыз күтіп отыр.
Кәсіпкерлердің ұлттық палатасы бірқатар кеңестер өткізді, онда өздерінің ұсыныстарын берді. Ақиқатында, осы мерзім ішінде не банктік несиелендіру көлемінде өсу, не экономикаға қандай да бір басқа құйылымдар болған жоқ.
Осыған байланысты, «Ақ жол» ҚДП депутаттық фракциясы үкімет басшысына келесі мәселелер бойынша жүгінеді:
1) Мемлекет басшысымен бөлінген 1 трлн. теңгені пайдалану бойынша талаптар қашан бекітіледі?
2) Көрсетілген қаражаттың барлығы тек қана өндіріс секторына жіберіле ме?
3) Көрсетілген қаражаттың қандай бөлігі жаңа жобаларға, қаншасы қолданыстағы кәсіпорындарды қалпына келтіруге бөлінеді?
4) Бөлінген қаражаттың қандай бөлігі банктік несиелерге субсидиялар арқылы емес, тікелей кәсіпорындарды қолдауға жіберілетін болады?
5) Үкімет бөлінген қаржының кәсіпорынға дейін түсуін қандай мерзімде қамтамасыз етеді?
6) Бұл қаражатты бөлу кәсіпорындардың өздерінің экономикалық тиімділігімен негізделе ме?
7) Осы берілген қаражатты мақсатты пайдалану үшін бақылау қалайша қамтамасыз етілетін болады?
«Ақ жол» ҚДП өзі тарапынан осы шараларды жүзеге асыру үшін парламенттік бақылау енгізу қажет деп санайды және оған қатысу үшін өзінің өкілдерін жіберуге дайын екенін білдіреді.
Бұл ақша аспаннан түскен жоқ, ол қазақстандықтардың маңдай терімен және еңбегімен табылған және Қазақстан халқына тиесілі екенін есте сақтау қажет. Сондықтан, бұл триллионда бір де бір «тегін» теңге жоқ, олардың әрқайсысын барынша жоғары қайтарыммен пайдалану қажет.
Азат Перуашев, Мәжіліс депутаты
