Аудандардағы ұжыммен кездесулер

Бүгін ҚР Парламенті Мәжілісі депутаттығына үміткерлер Алмас Тұртаев  пен Азиз Қожамбетов партияның үгіт-насихат шаралары аясында Қызылорда облысы, Шиелі ауданындағы «Шиелі индустриалды-аграрлық колледжінің» және Жаңақорған ауданындағы  «Шалқия-Цинк LTD» АҚ кен өндіру орындарының  ұжымымен кездесті.



Кездесу барысында үміткерлер Сыр өңірінің жан-жақты өркендеуіне атсалысып жатқан аталмыш ұжымдардың  жұмыстарына сәттілік тілеп, алдағы саяси науқанда сайлауға бірауыздан қатысуға шақырып, ҚР Парламенті Мәжілісінің 5-шақырылымындағы «Ақ жол» Парламенттік фракциясының білім саласындағы, шағын және орта бизнес, шикізат өндіру салаларындағы ақсап тұрған мәселелерді шешу мақсатында жасалған жұмыстарына тоқталып өтті.



Сонымен қатар кездесуге қатысқан жұмысшылар кәсіптік оқу орындарының мәртебесі, студенттердің кәсіптік тәжірибиеден өту, зейнетақы реформасы және тағы басқа да мәселелер бойынша көкейлерінде жүрген сұрақтарын қойып, қанағаттандырарлық жауаптар берілді. Кездесу соңында колледж және өндіріс орынының жұмысшылары үміткерлерге «Ақ жол» тілеп, ақ баталарын берді.

«Ақ жол - Қызылорда» баспасөз қызметі.