18
Ақпан
Руслан Мырқалықов шаһардағы №20 мектепте сайлаушыларымен кездесу өткізді
18 ақпан 2025 жыл, Жамбыл облыстық филиалы
Сайлаушылар ақжолдық депутатқа алғыс айтты.
«Ақ жол» партиясынан сайланған Тараз қалалық мәслихатының депутаты Руслан
Мырқалықов шаһардағы №20 мектепте сайлаушыларымен кездесу өткізді.
Кездесуге №8 сайлау округіне қарасты аумақтың тұрғындарымен қатар, партия
филиалы төрағасының орынбасары Сейсекүл Әбдісаттарова, филиал заңгері Жеңіс
Сариев, филиалдың Жастар қанатының көшбасшысы Қадыржан Есенов, белсенді жастар Бақытжан
Момышев, Жәнібек Жетпісбай қатысты.
Жиынды ашып берген Сейсекүл Дүйсебайқызы Руслан Мырсапарұлының 2024 жылдың
қорытындысы бойынша республика бойынша «Ақ жол» партиясынан сайланған
депутаттар арасында үздік атанғанын атап өтті.
Тұрғындар алдындағы есеп беру жиынында ақжолдық депутат 2024 жылы атқарған
депутаттық жұмыстарының барысына тоқталды.
«Өзім сайланған №8 сайлау округіне қарасты және қаламызға ортақ түйткілді
мәселелермен таныспын. Бірқатар проблемаларды 2023-2024 жылдары өздеріңізбен
бірнеше рет кездесіп, талқыладық. Соның негізінде қала және облыс әкімдігіне,
басқа да тиісті мекемелерге жалпы саны 27 депутаттық сауал жолдадым», - деді
Руслан Мырсапарұлы.
Депутаттың сауал жолдап, көтерілген мәселелерді бақылауға алуының
нәтижесінде шешімін тапқан проблемалар:
1. Шаһардағы Ы.Дүкенұлы атындағы көшеге жаяу жүргіншілер жолы салынды;
2. Крылов көшесіндегі №20 мектепке қатысты 5 мәселенің үшеуі шешімін тапты:
көше бойындағы талдар кесілді, көше жарықтандырылды, мектеп алдындағы жолға
асфальт төселді. Алдағы уақытта Калаур Әкім көшесінен мектепке дейін тротуар
және мектеп жанынан автотұрақ салу ұсынысы бойынша келісімдер жүргізілде;
3. Қаладағы заңсыз орналасқан дүңгіршектерге қатысты тиісті шаралар қолдану
бойынша жолданған сауал қозғау салып, қала әкімі Б.Орынбековтің қаулысы
негізінде өткен аптада арнайы жұмыс тобы құрылып, зерделеу жұмыстары қарқынды
бастау алды;
4. Зербұлақ көлін және оның
аумағын жеке кәсіпкерлерге, оның ішінде
қоғамдық демалыс орындарына арналған жерлердің жеке меншік инвесторларға, көп
қабатты тұрғын үй салуға берудегі талаптар қайшылығы туралы депутаттың қала
прокурорына, қала әкіміне жолдаған сауалы қаралу үстінде;
5. Үшбұлақ каналын механикалық тазалаудан өткізу, кіші көпірлерді жөндеу
туралы мәселе шешімін тапты;
6. Гоголь көшесінің бұрылысындағы балалар ойын алаңшасына тұрғындар партия
жастарымен бірге тазалық жұмыстарын жүргізді;
Ақжолдық депутат бұдан бөлек, 2024 жылы ҚР заңнамаларына қатысты 3 ұсыныс
әзірлеп жолдаған. Қалалық мәслихаттың 26 сессиясынан басқа, дөңгелек үстел,
конференция форматындағы 21 жиынға қатысып, әлеуметтік мәселелер мен
инфрақұрылымды жаңғырту салаларына қатысты сөз сөйлеген. Қала тазалығына жауаты
«Жасыл Тараз» мекемесінің, жылу беру маусымы кезінде балабақша, мектеп,
емханаларға зерделеу жұмыстарын жүргізген.
Сондай-ақ 16 қайырымдылық іс-шарасына қатысып, өз бастамасымен бірнеше рет
мұқтаж жандарға қолдау-көмек көрсеткен. Әр көшенің белсенді азаматтарын жинап,
ватсап әлеуметтік желісінде ортақ чат ашып, тұрғындармен кері байланыс жүйесін
жолға қойған.
Айта кету керек, депутаттың есеп беру жиыны ашық диалог форматында өтті.
Кездесудің тағы бір ерекшелігі – жиынға сайлау округіне қарасты шағын
аудандардың бас инспекторлары мен Тараз қаласы әкімдігінің тұрғын-жай
коммуналдық шаруашылық, жолаушы көлігі және автомобиль жолдары бөлімі
басшысының орынбасары Жарқынбек Аманбекұлы шақырылып, тұрғындар қойған сұрақтарына
жауапты мамандардан бірден жауап ала алғаны болды.
Сайлаушылар ақжолдық депутаттың жұмысына оң бағаларын беріп, алғыс айтты.
Жиында көшені жарықтандыру, канализация, жаяу жүргіншілер жолы, көшеде
орнатылған жол белгілері, тазалық жұмыстарына қатысты сұрақтар қойылып,
көптеген мәселелер көтерілді.
