«Ақ жол» демократиялық партиясының референдум қорытындысы бойынша мәлімдемесі

«Ақ жол» демократиялық партиясының референдум қорытындысы бойынша мәлімдемесі

Құрметті қазақстандықтар!

«Ақ жол» демократиялық партиясы Қазақстан Республикасының барша халқын Жаңа Конституцияның қабылдануымен шын жүректен құттықтайды!

Осынау тағдыршешті сәтте ұлтымыз жоғары азаматтық жауапкершілік пен саяси кемелдік таныта білді. Бұған дауыс беру учаскелеріндегі сайлаушылардың жоғары қатысуы дәлел.

Бұл – Конституция жобасын әзірлеу, сондай-ақ оны еліміздің барлық өңірлері мен салаларында, жергілікті қауымдастықтар мен еңбек ұжымдары арасында түсіндіру бағытында жүздеген, мыңдаған отандастарымыздың атқарған ауқымды жұмысының нәтижесі.

«Ақ жол» демократиялық партиясы Парламенттік реформа жөніндегі Жұмыс тобы мен Конституциялық комиссияның барлық мүшелеріне ел алдында тұрған ең өткір мәселелерге жауап беретін сапалы әрі мазмұнды құжатты бірлесе әзірлегені үшін ризашылығын білдіреді.

Жаңа саяси модельдің қалыптасқан тәсілдері мен институттары Қазақстанға экономиканы сенімді түрде дамытуға, халықтың әл-ауқатын арттыруға, озық технологияларды енгізуге және ұлттық мүдделерді болашақта ілгерілетуге мүмкіндік береді деп есептейміз.

Жаңа Конституцияда жұмыс тобы мен комиссия отырыстары барысында, сондай-ақ алдыңғы жылдарда партиямыздың тарапынан ұсынылған бірқатар бастамалардың ескерілгені біз үшін ерекше мәртебе. Олардың қатарында, пропорционалды жүйе бойынша сайланатын бір палаталы Парламентке көшу; мемлекеттің кепілдіктері мен қорғауын меншіктің барлық түрлеріне тарату; банк құпиясын және келіссөздер құпиясын, соның ішінде цифрлық технологияларды пайдалану арқылы қорғау; Республика мемлекеттілігінің Ұлы даланың мыңжылдық тарихымен сабақтастығы және басқа да маңызды мәселелер бар.

Бұл өзгерістердің барлығы авторитарлық жүйеден арылып, теңгерімді, қуатты, бәсекеге қабілетті және көпқырлы саяси модельдің қалыптасуына; саяси партиялардың нығаюына және қоғамның түрлі топтары мүдделерінің мемлекеттік басқару жүйесінде кеңірек қамтылуына жол ашады. Президент Қ. Тоқаевтың «Әділетті Қазақстан», «Заң мен тәртіп» атты базалық қағидаттары еліміздегі шынайы демократияның алаңына айналмақ, себебі, демократияның басты мақсаты – Заң арқылы жүзеге асатын Тәртіпке сүйенетін Әділеттілік.

Мемлекет пен қоғам арасындағы сенім мен әріптестіктің дамуы; азаматтық және кәсіпкерлік бастамалардың жаппай белең алуы; жастардың ғылыми және технологиялық жобаларға кеңінен тартылуы; сондай-ақ инновациялар мен цифрлық әзірлемелердің, соның ішінде жасанды интеллекттің өндіріске, экономикаға және қазақстандықтардың күнделікті өміріне жедел енгізілуі Жаңа Конституцияның тікелей нәтижесі болады деп сенеміз.

Осының барлығы Қазақстанды XXI ғасырдағы ең прогрессивті, табысты және креативті елдердің қатарына шығарады.

Катонқарағайдан Кендірлі, Мамлюткадан Мырзакентке дейін, біз тұтас ел аумағын қамтыған бұрын-соңды болмаған ауқымды үгіт-насихат жұмыстарын жүргізген Жалпыхалықтық коалициядағы барлық әріптестерімізге шынайы алғысымызды білдіреміз. Оның барысында ұжымдармен мыңдаған кездесулер өткізіліп, әрбір азамат өз пікірін білдіріп, көкейіндегі сұрақтарына жауап алу мүмкіндігіне ие болды. Осы жұмыста «Ақ жол» Демократиялық партиясының мыңдаған жақтастары лайықты рөл атқарғанын мақтан тұтамыз.

Жаңа Конституцияның шынайы авторы – Президент Қасым-Жомарт Тоқаевқа оның кәсібилігі, азаматтық батылдығы, өз халқына және борышына адалдығы үшін ерекше ризашылығымызды білдіреміз.

Саяси даму заңдылықтарын терең түсіну Қасым-Жомарт Тоқаевқа соңғы апталарда әлем куә болған жаһандық өзгерістерді күтпей-ақ, оқиғалардың ауанын болжай отырып, қазіргі және алдағы сын-қатерлерге сай мемлекеттік құрылымды реформалауға кірісуге мүмкіндік берді.

Жаңа Конституция Мемлекет басшысының 2022 жылғы реформасы аясында басталған бастамаларының заңды жалғасы әрі шырқау шыңы болғанын мойындау қажет. Экономика мен саясатты демонополизациялау бағыты дәл сол кезде айқындалып, Парламент палаталарының жұмысын қайта жаңғырту қолға алынды, жер мен жер қойнауының Қазақстан халқына тиесілі екені бекітілді және т.б.

Бүгінде біз бұл өзгерістердің саяси-экономикалық, әлеуметтік және қоғамдық сананы жаңғыртатын қайтымсыз прогреске ұласып жатқанын көріп отырмыз. Жаңа Конституцияда ғылым мен білімнің басымдығына, адам құқықтарын қорғауға, халықтың әл-ауқаты мен өмір сапасын арттыруға, әр азаматтың шығармашылық әлеуетін жүзеге асыруға ерекше назар аударылғаны да кездейсоқ емес. Бұл жоба жас ұрпақ үшін білімге, амбицияға және технологияға толы ашық әлемде табысты болашаққа жол ашады; шынымен мұқтаж адамдарды қолдаудың сенімді кепілдіктерін қалыптастырады. Құжат тек адамға бағытталған ғана емес, сонымен бірге құқық қорғаушылық сипатқа ие.

Әскери қақтығыс өршіген Таяу Шығыстан Қазақстан азаматтарын эвакуациялау кезінде мемлекетіміздің батыл әрекеттері Президент Қасым-Жомарт Тоқаевтың ішкі және сыртқы саясаттағы басты басымдықтарын тағы бір мәрте айқын көрсетті.

Ұлттық бизнес, өнеркәсіп және кәсіпкерлердің өкілі ретінде «Ақ жол» демократиялық партиясы Жаңа Конституцияда нарықтық экономиканы дамытуға, шикізаттық тәуелділіктен арылуға, елдің заманауи, көпсалалы, технологиялық әрі бәсекеге қабілетті өнеркәсіптік құрылымын қалыптастыруға, шағын және орта бизнесті қолдауға, сондай-ақ миллиондаған азаматтарды бастама мен еңбек арқылы ұлттық табысты қайта бөлу үдерісіне тартуға мүмкіндік беретін бірқатар конституциялық жаңалықтарды ерекше атап өтеді.

Біз жедел дамитын қалалардың мәртебесін бекітуді ерекше құптаймыз. Бұл инвесторларға бюрократиялық кедергілерге алаңдамай, ең озық ІТ-технологиялар мен цифрлық құралдарды, соның ішінде жасанды интеллектіні енгізуге жол ашады. Бұл мемлекетімізге сәтті шешімдер ауқымын кеңейтуге және әлемнің ең технологиялық экономикаларымен бір толқында дамуға мүмкіндік береді. Ал ұлттық валютаның конституциялық деңгейде бекітілуі мемлекеттің егемендігі мен ұлттық экономикалық қауіпсіздігінің маңызды факторына айналды.

Жаңа Конституцияның осы және басқа да көптеген аспектілері үгіт-насихат кезеңінде Жалпыхалықтық коалиция құрамында өткен көптеген кездесулерде кеңінен талқыланды. Айта кету керек, азаматтардың басым бөлігі сол кезде-ақ бұл құжатты қолдайтынын білдірген болатын. Мұны кеше өткен референдум нәтижелері де айқын көрсетті. Сондықтан бұл құжатты толық негізбен Халықтық Конституция деп атауға болады.

Сайлаушылармен кездесулер барысында Президент Қасым-Жомарт Тоқаевтың жобаны әзірлеуге жеке қатысуы ерекше сенімді дәлелдердің бірі болды. Ал референдум нәтижелері тек құжатқа берілген бағаны ғана емес, сонымен бірге қазақстандықтардың Мемлекет басшысының саясатына деген жоғары сенімін де көрсетті.

Құрметті отандастар! Бүгінгі күннен бастап біз өзімізге және міндетті түрде ұлтымыздың жетістік жылнамасына айналатындықтан өз батылдығымызға байланысты тарихты жасап жатырмыз. Оның берік негізі – біздің Ата заңымыз!

Баршаңызды құттықтап, елімізге бейбітшілік пен өркендеу, әр азаматқа зор денсаулық, амандық және жаңа жетістіктер тілейміз!