27
Сәуір
«Ақ жол» мемлекеттік кәсіпорын 1,7 млрд теңге қарыз болған 93 ШОБ компаниясының мүддесін қорғауды талап етті
27 сәуір 2022 жыл, «Ақ жол» демократиялық партиясының баспасөз қызметі
ҚР Бас прокурорына
Президенттің барлық Жолдауларында шағын және орта кәсіпкерліктің ел экономикасындағы маңызды рөлі атап өтілген. Алайда, күн сайын «Ақ жол» партиясының атына кәсіпкерлерден мемлекеттік органдар тарапынан жасалған әрекеттер мен әрекетсіздіктерге қатысты шағымдар келіп түсуде.
Фракция атына «Әскери құрылыс Астана» ЖШС кәсіпкер-кредиторларының ұжымдық өтініші келіп түсті, оған 93 компанияның басшылары қол қойған.
Кәсіпкерлер «Әскери құрылыс Астана» ЖШС-нен 2020 жылы жалпы сомасы 1,7 миллиард теңгеден астам тауарды жеткізу және орындалған қызметтер үшін қаражатты қайтару мәселесін шешуге көмек көрсетуді сұрайды.
БАҚ-та бұл жанжал өткен жылдың сәуір айынан бастап, кәсіпкерлер Қорғаныс министрлігінің ғимаратына митингке шыққан кезден бастап жарияланып келеді. Сол кезде Министрлік өкілдері ведомстволық бағынысты ұйымның қызметін тексеріп, жазда бұл мәселені шешуге уәде берген болатын.
Кәсіпкерлер мезгіл-мезгілімен Қорғаныс министрлігінің ғимаратына жиналады. Бірақ мәселе әлі күнге дейін шешілмеген, ал полиция жағдайды ушықтырып, олардың жиналыстары үшін айыппұл да салған. «Әскери құрылыс Астана» ЖШС - Қорғаныс министрлігінің ведомстволық бағынысты ұйымы болып табылатын «Әскери құрылыс» АҚ-ның еншілес кәсіпорны.
Жеңіп алынған мемлекеттік сатып алулардың негізінде бизнес субъектілері 2020 жылы «Әскери құрылыс Астана» ЖШС-нің түрлі филиалдарына қызмет көрсетіп, тауарларды жеткізуді жүзеге асырды.
Кәсіпкерлердің айтуынша, төлем жасалған сәттен бастап «Әскери құрылыс Астана» ЖШС-нің барлық байланыстары мен электрондық мекенжайлары өшірілген. Кәсіпкерлер мемлекеттік органдарға барлық өтініштерге тек қана сілтемелер алған.
Жағдай күн сайын шиеленісіп, ұжымдар мен отбасылардағы моральдық және психологиялық ахуал өте нашарлауда. Кәсіпкерлер қарыздарымен, кредиттерімен және қызметкерлердің жұмыстан босатылуымен өздері бет-бетпен жалғыз қалды.
Қорғаныс министрлігі Алматыда жалпы ауданы 18 мың шаршы метр болатын 240 пәтерлік 4 құрылысы аяқталмаған үй бөлуді ұсынады, бірақ бұл үйлерді сату құрылыс аяқталған кезде де бірінші кезектегі берешекті өтемейді. Сондықтан мемлекеттік органның ұсынысын кәсіпкерлер мәселені шешуді кешіктіру және өздерінің құқық бұзушылықтарын жасыру мақсатында алдау деп бағалайды.
Азаматтық кодекстің 10-бабының 2-тармағында мемлекеттің басты міндеттерінің бірі - кәсіпкерлік қызмет еркіндігіне кепілдік беру және оны қорғау мен қолдауды қамтамасыз ету болып табылады.
Кәсіпкерлік кодексінде мемлекеттік органдардың кәсіпкерлік субъектілерінің мүдделерін қозғайтын шешімдер қабылдау бойынша өз қызметінің ашықтығын қамтамасыз ету міндеті айқындалған. Бұл ретте Кодексте кәсіпкерлікті мемлекеттік реттеудің тиімділігіне, оның ішінде кәсіпкерлік субъектілеріне залал келтіргені үшін мемлекеттік органдардың лауазымды тұлғаларының дербес жауапкершілігін енгізу арқылы қол жеткізілетіні белгіленген.
Парламент қабылдаған заңдар бизнесті реттеудің, қолдаудың және қорғаудың барлық негізгі принциптерін нақты белгілейді.
Жоғарыда баяндалғанның негізінде, «Ақ жол» фракциясы аталған проблеманы шешу және кінәлілерді ең қатаң жауапкершілікке тарту үшін прокурорлық ден қою шараларын қабылдауды талап етеді.
Құрметпен,
«Ақ жол» фракциясының депутаттары
